Reihen


Reihen

  Startseite
  Über...
  Lexikon
  Gästebuch
  Kontakt
 


 
Links
   Reihen.de




http://myblog.de/reihen

Gratis bloggen bei
myblog.de





 
sow hald

Wannd duscha dusch, dusch duscha.
Un wannd gluschda hasch, hasch gluschda.
reihen am 24.6.17 10:41


Werbung


Pfipfass

Bass uff, dass d ned da Pfipfass griigsch.
reihen am 11.1.17 10:38


A guds neis Joo

A guds neis Joo un a Bretza wie a Scheiaradoor.
reihen am 30.12.16 18:19


Reime

Rumelti Bumpel Holderstock, wiefiil Hänna had da Bock, wifiil Finga steena?
reihen am 5.10.14 12:29


Schdeesa

Ledschd haw i ona gsea, dä isch mid ama gans alda Schdeesa rumgfara. Dä had vieleichd gaquidschd, do ghäd Fedd no, haw i gadengt, awwa ned uffd Brems, schunsch dud si nimmi.
Wann do an Bolizischd vobai kumma wä, dä wä reich worra.
Achsow du woisch ned was an Schdeesa isch? Des isch a uralds Faarad.
reihen am 14.4.11 00:17


Schwedsa

Wann ona schwedsd un moond s wäär reiamarisch, muss's noch lang ned reiamarisch sei. Sella hengd a "lä" dro un s isch ittlingamarisch. "S Männlä" hoisst in Reia "S Mennl" ohne "ää". Wä koon Mann isch, isch a Mennl un wann a sich noch so uffbloosd. "Frühstücken" denna mir a ned, mir veschbara - unn wanns blows a Musabroud isch. Veschbara kenna mir awwa a owads, oda koz bevor ma ans Bedd nei ligga.
reihen am 5.4.11 23:27


Ledschd in da Kärch

Ledschd bin i amol widda an da Kärch gwesd. Kumm i an mein Blaz no, hoggd doch do sow an Zugezoggana dod. Do bin i awwa a bissl laud worra und hab dem gazeigt, wä do hoggd un wä ned. Dä hat vieleicht dumm gaglzozd un isch uf a andari Bank hindari ghoggd. Dann had da Pfarra uf da Kanzl vun da Nechschdalieb gabreddigt - do hat a dann ghääd, dass ma ama andara ned oifach sein Blaz wegnemma däff! - Sow an Simbl.
reihen am 15.3.11 01:12




Nach via väddl secht da Wäd zum Hans: "Jedsd deffsch awwa nimmi mid deim Audo homfaara". "Awwa laafa kann i a nimmi".
Reihen am 22.3.10 18:20


Sow ebbas

Was mechsch?
Nix
Soll i da helfa?
reihen am 15.12.09 01:06


Hald dei bleedi Goscha

Wann i jedsd s Maul uf mach, sechd bschdimd widda ona: Hald dei bledi Goscha.
Awwa smuss gsagd werra. S isch furchdba wie mia vun denna in sinsa voseggld werra. Di macha grad was sie wella. Haschs scho ghäd, jezd hewwa sie da Bebauungsbloo gändad, dass sie des Gremadorium drodzdem baua deffa. Isch scho bled, mid am alda Bloo hed ganix gebaud werra deffa, awwa d "Schlidschufara" hewwa do a paa Biruedda oder so was eenlichs gedred. Mir werra voseggld.
reihen am 23.11.09 11:06


Noi, i sag nix

i sag nix zum Gremadorium un a ned zum Kindagaada. Des kenna di andara bessa.
Schweza ma amol fum Holz - wie geds deim Kopf. Noi, Schbass.
Awwa s Holz isch jo a sow a Sach, wanns am Winda sow kald wäd, wie d Leid Holz macha, weds Aschkalt.
D Kerwi wa desjo uf am Linnaboomblaz, gud gmacht, denn des isch da richdig Blaz. Do, des wissa die alda Reiama, wor fria Margd, oimol am Jo def do Margd sei, am Mondag fo am 8. Sebdemba. Mol gugga, was nexd Jo wed...
Ach ja, Schloza un Gudsl hads am Stand a gewwa. Ha ja, uff da Kerwi.
reihen am 27.10.09 10:48


Kalt ischs worra

Sow schnell ischs jedsd kald worra. Un langsom awwa sicha falla alli Bledda fun da Beem.
Jedsd messa ma widda ondlich Laab keera. Ja sow isch s hald.
Un wu schmeissa ma den Gruschd no? Ha an da Bachroi.
Un was do scho allas ligt. Browd un Kadoffl fum ledscha Joo. Un Dreschda had dod o Pladz. Schenschd ischs, wann ebba alds Floisch in a ra Blaschdichdascha no schmeisst.
reihen am 24.10.07 11:32


Haschs scho ghäd?

Wann d Leid babbla, ischs beschd du häsch weg. Noi sow ischs a widda ned. Denn, d hälft kend schdimma. Blows wois ma ned, ischs die äschd helfd wu schdimmd, oda ischs die zwoid hälft. S keend awwa o sei, dass ab am eschda fäddl s eschd fäddl schdimmd un dann widda vum ledschda feddl d' helft zamma mid da helft vom eschda un vum dridda feddl s' ledsch schdig. Odda so eenlich.
Bei dem dragischa Ufall fum Siega had ma ghäd: Ä isch mim Mobeddl gfara un hat an Ohenga dro ghad. Do dafu schdimmt, dass da Siga an dragischa Ufall ghad had un ä isch gfara - un schlimm ischs!

Un am Foschdweg hewwa si widda an Gschwindichkoitsmessa noghengt. Wu i grad druffgaglozt hab, isch ona mid ama Mofa fun Schdoifod ruff ograst kumma, 38 hads ogazoigt - dä hat bschdimmd fiwa ghad.

Soll i jedsd noch ebbas iwwa's DSL von da Delegom saaga?
Noi i sag liwwa nix - s' isch bessa fo mei Nerfa. Do ded i widda foll nei dabba, weil i kann jo a mei Maul ned halda - un wannd was gsagt hasch, ischs gsagd - un was sdimmd do dafu?
Noi liwwa ned, schunschd ischs "Dobbladernbar" gedobt - odda s' gibd ga koi DSL?

In diesem Sinne: Babbl ned sow fiil.....
reihen am 26.5.07 01:01


D' Renza schbanna widda

S' nei Joo had gud ogfanga. Ow hewwa mir gfressa. D' Renza schbanna wid Sau. Jedsd messa ma widda langsoom dau.

An Silweschda hewwa si gschossa wi bleed, i glaab sow fiil wi des Joo wa 's scho lang nimmii. I glaab, alli hewwa nomol ondlich gakaaft, befoo d Määwädschdeia mee wäd.
Was des wäd, di do owwa, di mona mir hewwa s Geld im Simmari schdee, die messa nix schaffa, di hocka mid irana braida Ääsch uff irana bequema Schdiil un schwedza blows.
Un mia, mia messa schaffa wi bleed. Holz macha messa ma. Oon Schdeer um da anda - un dann kumma do so a poo Seckl un glaua uns 's oon Brigl um da anda fum Schdeer weg. Dabei braucha mia des doch selwa, "da nexd Winda kummd bschdimmd", des isch gwiis.

Ah, des Joo kummd in Raia da Uffschwung, s' Gewerbegebied deff jeds a fun andara bebaud werra. D' Schdadd had da Bebauungsbloo geändad. Jedsd deff da Furundanema Abale vun Hilschbach do owwa no baua, an riisicha Bargblaz fo sei Laschdweega -S' isch also nix gwesd mid ama growsadicha "Arbeidsbläz schaffa".

Wii had sella gsaagd: "Guuga ma amool" odda sow eenlich.
reihen am 8.1.07 14:16


Scho widda

Scho widda ischd Raifeisi iwwafalla worra. Heid, koz fo da Zwelfa isch ona, ä soll a schwazi Schdrumfmasga iwwas Gsicht gazoga hawwa, and Bangg nei un hat Finfadreissichdausad Euro gaglaud.
Iwwaral wa d Bolizei un an Hubschrauwa isch a rumgflogga.
Dä Schbizbu soll fodgrennd sei, d Wissaschdroosa nunda. Awwa si hewwan ned gfunna. An Glazkopf hada un isch ugfä fäzich.
Schbeda had an glona Bu ganz draurich gsagd: "jezd isch mei Geld fod". Uff da andara Schdrosaseida had an Eldara zu ama Banggogschdelda gsagt: "Fo eich wäd des numma an Vosicherungsfall gewwa, dodafo seid a jo vosichad". Na dann.
reihen am 26.10.06 17:57


Des glaabsch ned

Haid moja isch da Achim uffgschdanna un had sich
sein middlara Finga vobabbd un an Fingerling
drib gmacht. S dumme isch blows: S isch am was
uff da Ringfinga gfalla.

Sow, da nei Pfarra isch jedsd a do. Jedsd messan
amol alli "beschnubbara". Awa ä wäds so recht
macha.

D Grischda had sich a neis Serwies gakaft un als
si s uf d Feranda draga gwed had, isch s a ra
ind Hand neigfara un sie hads nundagschmissa.
Jedsad ischs hi.

S Grembreilings Friedhelm sei Fra, d Annerose
had an besa Ufall ghad. Wu si fum Deich mim
Farad kumma isch, isch ona mim Audo ograst
kumma un had si sow bled fowischd, dass sie
mim Kopf uff d Windschudzscheiw gflogga isch.
S had furchdbo ausgsea. Awwa do isch a
Wunda bassiad, si had numma a paa
Schniddwunda un a gabrochaa Fussglengk
khad.
reihen am 7.10.06 18:35


s' Naischd

Do soll a mol ona saaga in Reia isch nix lows.
S' isch fil lows, blows mergds nimand.

Do ischs Karras Wilhelm uf da Sau fod un
isch ans Grangahaus kumma. S had an
saumesich an da Schuldara erwischd.
S gehd am awwa scho bessa, ä kann
widda rumlaafa.

Beim Lewäd brummds Gschefd grad, da
Adolf hads Gschefd an sei Nichde
abgewwa un sie un iran Mann hewa da
Houf zu a ra Gadawedschafd gmacht.
Jedsd kann ma naushogga.

Am Waldfeschd hasd amol widda gregad.
Wie fasch alli Joor.

Desjoor isch widda Dorfescht, heid geds
lous. Um Viera.

S Bleddl "Sinsa Agtuell" kummd jedsd a
widda in jedas Haus, voher sen die Dinga
imma ind Bach gschmissa worra.

Da Schdefan isch in Coschda Riga, do dud a
mid m Bagga schaffa. Awwa seina had a
ned midgnumma, die hewwa scheinar a
sow Dinga do driwwa.

S isch hald sow in Reia, wenn nix passiad
isch nix lows - un wenn nix passiad, sen
ma all frow, dass nix passiad isch.
reihen am 26.8.06 11:59


Baua

I will amol widda was neischreiwa. Also, was gibds neis?
D Baublez "ob da Ziglhidda", des isch do wu'd ald Lemgruwa wa. Wu da "Eilafäschda" sein Wald ghad had, ka ma jezd kafa. Da Gwadradmeda koscht 160 Eiro.

Wä am Gewerbepark "Owwara Renggrund" baua will, muß blows sechzich Eiro blecha, awwa s'muß Gwerbe sei.
Da Bock baud scho. Des isch a Firma, die mecht Rollschdiel un Brodesa.

Am Schbodjo kummt bei da Evangelischa an neia Pfarra, do wed jezd s Pfahaus umgabaud.

D' Haubdschdroßa isch imma noch gschbädd. Des gibd a längari Gschicht. Unnadrunda isch allas Schlamm. Ow ow, des wäd deia.

Beim Stois Dida isch jo ona mim Audo in da Gada grasd, do wäd jedzt an neia Zau gabaud un neia Beem gsezd.

Un was i jedsd äschd gsea hab, d Elsensbrigga zu s Kellas Miel, des isch sow a Rundboga Schdoibrigga, die isch komblet renowiad worra, die sied aus wie nei.
reihen am 12.5.06 10:33


Glidda

Also geschdan owad, am Freidichowad, had da
Ruddl zum Sunndich glidda.
Zesch haw i gedengt, dass ebbas in da Kerich isch,
awwa s' hat dann koi Lichd gabrennt.
Des isch scho komisch gwest.
S' hätt jo sei kenna, dass da nei Koor iwa dut,
do, da "A Cabella" oda sow eenlich, den fum
Leschhon. Die denna nemlich an Kafreidich
in Weila an da "Annakerch" singa un da
Leschhon dud aus da Biwwl folesa.
S' kennd awwa a sei, dass a blows d
Glogga ausbrowiead had.
reihen am 8.4.06 08:45


S'isch Wal

Da Brifkaschda isch foll. S'isch Wal. Was do widda allas neigschmissa grigsch.
Uf denna Zedl, do sisch blezlich Leid, vun denna hasch noch nie ebbas ghed.
"Wir gestalten die Zukunft" odda adnara Schbrich. Was do widda allas vaschbrocha wed - Ha, ira Zukunft werra si scho gschdalda un ira Scheefl ins druggene bringa.
Des wa schu imma sow.
Awwa wa ma ned weela dud un's kumma di andara no, ka ma nedamol schelda - un des denna mir Reiama imma, egal wä dro kummd.
reihen am 22.3.06 15:35


 [eine Seite weiter]



Verantwortlich für die Inhalte ist der Autor. Dein kostenloses Blog bei myblog.de! Datenschutzerklärung
Werbung